Унгарскиот премиер Виктор Орбан изјави дека Европската Унија „се дави во корупција“, коментирајќи ја истрагата за наводни злоупотреби во проект финансиран од ЕУ за обука на млади дипломати.
„ЕУ се дави во корупција. Комесарите се соочуваат со сериозни обвиненија, Комисијата и Парламентот се опфатени со скандали, а Брисел и понатаму држи лекции по морал“, напиша Орбан на социјалната мрежа Икс.
Неговата реакција следува откако белгиската федерална полиција во вторникот, на барање на Европското јавно обвинителство (ЕППО), ги приведе поранешната шефица на европската дипломатија Федерика Могерини, висок член на Колеџот на Европа во Бриж, и висок функционер на Европската комисија.
🇪🇺 The EU is drowning in corruption. Commissioners face serious charges, the Commission and the Parliament are engulfed in scandal, yet Brussels still claims the moral high ground. Corruption in Ukraine should be called out by the EU, but once again it's the same old story:… pic.twitter.com/m9PwkrqzwX
— Orbán Viktor (@PM_ViktorOrban) December 5, 2025
ЕППО соопшти дека истрагата се однесува на тоа дали доверливи критериуми за избор на учесници во ЕУ Дипломатската академија – деветмесечна програма за млади дипломати доделена на Колеџот во периодот 2021–2022 – биле незаконски споделувани пред објавата на тендерот.
Орбан напиша и дека „корупцијата во Украина треба да биде јавно посочена од ЕУ, но повторно се повторува истата приказна – Брисел и Киев се штитат меѓусебно наместо да се соочат со вистината“.
Минатиот месец украинските антикорупциски институции открија масовна корупциска шема во енергетскиот сектор, со злоупотреби од најмалку 100 милиони долари, особено поврзани со државната компанија Енергоатом, што доведе до серија оставки, меѓу кои и на министерот за енергија и на шефот на кабинетот на претседателот Володимир Зеленски.
Сузбивањето на корупцијата е клучно за напредокот на Украина кон членство во ЕУ, која во јуни 2024 официјално ги отвори пристапните преговори со Киев.
