Еурофарм Пелистер доживеа нов пораз во Лигата на шампионите, откако вечерва беше поразен на гостувањето кај хрватскиот шампион Загреб со 27:23, во натпревар од 10. коло во групата Б. За Загреб ова беа првите бодови сезонава во елитното натпреварување.
Македонскиот шампион одлично го отвори дуелот и рано поведе со 5:1, но по десетина минути игра падна концентрацијата во нападот. Хрватскиот тим постепено ја намалуваше разликата и набрзо стигна до израмнување 7:7, а на пауза замина со предност од 14:12.
Во вториот дел блескаше голманот на Загреб, Сандро Мештриќ, кој со 12 интервенции беше клучниот играч во одбраната на домашниот состав. Во повеќе наврати хрватскиот првак стигнуваше до водство од шест гола, а разликата најчесто се движеше меѓу четири и шест погодоци.
Филип Главаш беше најефикасен на натпреварот со 10 гола, додека кај Еурофарм Пелистер најдобар стрелец беше Филип Кузмановски со седум погодоци.
Пелистер останува со четири бодови на седмото место во групата Б. Следниот натпревар битолчани ќе го одиграат дома на 19 февруари 2026 година.
