Возачите низ Скопје утрово како да почнаа да возат попитомо. Застануваат почесто на пешачки, нема толку многу пребрзи возила.
Голем беше шокот од 110-те илјади опомени за само еден ден од МВР и новиот систем „Безбеден Град”. Мнозинството од граѓаните со одобрување го прифаќаат електронско известување за сторениот прекршок и наведената казна за тоа. Неопходно беше нешто вакво за да се воведе ред, се најчестите реакции.
Една од дилемите кои сметаат дека треба да се поправи е воведување на толеранција за измерената брзина при возењето.
– Преминување на две полни линии Системот не ги регистрира. Таков смртнозагрозувачки ризик не регистрира, а најголемо зло му е ако некој вози со 53 километри на час – што може да биде статистичка грешка, реагира еден граѓанин.
Го поддржувам проектот, но Системот мора да има праг на толеранција барем од 5 километри на час во град. Цело време ли ќе гледам во брзинометарот додека возам или ќе гледам и што се случува на улицата, реагира друг граѓанин.
Останува да се види дали МВР ќе ги прифати овие укажувања кои впрочем се и пракса во повеќе земји во Европа. Министерот Панче Тошковски вчера најави дека ќе се разгледа можноста за извесна толеранција на брзината.
