Цел ден на разни места низ Скопје стручни екипи домонтираат или оспособуваат камери кои ќе ловат несовесни возачи. Од синоќа голем дел од камерите почнаа активно да снимаат, односно почна да работи системот „Сејф сити”. Самото почнување да снимаат ја започна и постапката на МВР до возачите преклу меил или СМС порака да испраќа опомени за прекршоци кои ги уловиле камерите.
Скопјанец утрово ни испрати таков полициски записник коментирајќи:
-Синоќа се враќав од Петровец и кога влегов дома во Аеродром видов дека на електронска пошта ми стигна записник дека сум сторил прекршок пред само 20-тина минути. Беше точно наведено местото на влезот во Скопје како и точното време кога сум возел со брзина од 63 километри на час на место каде е дозволено 50, ни објасни аеродромецот додавајќи дека во записникот уредно биле напишани сите податоци од возилото, која камера го сторила снимањето на прекршокот и кога сета таа апаратура била баждарена.
Во документот стои дека возачот е казнет со 45 евра, но јасно е напишано со големи букви дека овој пат се работи само за опомена.
-Пофалби за брзината и точноста на полициската активност, браво за ова. Го поддржувам овој начин на воведување ред во сообраќајот и од денес многу повеќе ќе внимавам, ни напиша аеродромецот.
Инаку, системот „Безбеден град, безбедна држава” автоматски ги регистрира прекршоците во сообраќајот и веднаш ги санкционира прекршителите. Тест-периодот, како што најавија од МВР ќе трае до Нова година, а со почетокот на 2026 година почнува пишувањето на казни.
Засега системот ќе регистрира – снима пречекорена брзина, минување на црвено светло, возење без важечка сообраќајна дозвола и непрописно паркирање и тоа не само во Скопје, за почеток и во Тетово и Куманово.
Суштината на проектот е да се воведе затворен круг – од снимање до казна – во кој човечкиот фактор е сведен на минимум, а процедурите се јасни и лесно следливи.