Децата низ игра треба да растат и да го спознаваат светот. Но, за жал дел од малолетниците во Македонија се почесто стануваат насилни, а некои дури и се навлезени во криминално агресивниот свет.
Фрапира последниот случај од завчера кога полицијата уапси 16-годишник од Охрид поради сомнение дека силувал 12-годишно девојче, а друг малолетник го снимал насилниот чин. И тука не завршува се, со видео материјалот дошол друг 14-годишник од Охрид и го уценувал девојчето.
Каде грешат родителите на овие деца? Каде греши општеството, односно институциите? На ова мора брзо да се бара одговорот оти вакви случаи не се ретки и има се повеќе невини жртви кои страдаат од невоспитани насилни деца.
На 23 ноември во полицискиот билтен стоеше дека мајка пријавила дека малолетник извршил обљуба врз нејзината малолетна ќерка. Ден пред тоа во Драчево основец во училиште бил претепан од негов соученик. Има уште многу случаи за набројување, но време е да се набројуваат преземените соодветни мерки тоа да не се случува.
