Карлос Алкараз го совлада Феликс Оже-Алијасим со 6:2, 6:4 и ќе игра за својот прв трофеј на Завршниот мастерс во Торино. Во финалето негов противник ќе биде Јаник Синер.
Канаѓанецот речиси и да немаше начин да му наштети на Алкараз, кој во текот на целиот меч му дозволи само една брејк-шанса. Феликс не ја искористи, додека првиот рекет на светот најголемиот дел од своите прилики ги претвораше во поени.
Првиот сет го доби убедливо со 6:2, а вториот – далеку понеизвесен – со 6:4. До десеттиот гем немаше ниту една брејк-топка, сè додека 25-годишникот од Монтреал не сервираше за да остане во игра.
И покрај поразот, Оже-Алијасим може да биде повеќе од задоволен од одличната форма што ја покажа во втората половина од сезоната. На следната АТП-листа ќе се најде на петтото место – негов највисок пласман во кариерата. Убав завршеток на сезоната по титулата во Брисел, полуфиналето на УС Опен и финалето на Мастерсот во Париз.
