Врховниот командант на вооружените сили на Украина (АФУ), генерал Олександр Сирски, денеска изјави дека ги посетил војниците што држат позиции во Покровск, клучен град во регионот Донецк, опколен од руската армија. Посетата доаѓа во време кога украинскиот претседател Володимир Зеленски се обидува да се справи со последиците од големиот скандал со корупција во енергетиката што ја зафати неговата администрација.
Генерал Сирски ги посети единиците на фронтовската линија кои се борат да го задржат Покровск под притисок од руските сили и рече дека лично ги координира операциите на терен – рече тој на Телеграм.
Украинските војници се заглавени во улични битки со руските сили во градот и се борат да ја задржат својата позиција за да избегнат да бидат опкружени од поголема руска сила, додека војната на исцрпување што ја водат руските сили полека се шири низ регионот.
Сирски рече дека главните цели се повторно преземање на контролата врз одредени области од градот, како и заштита на логистичките патишта и создавање нови за снабдување на војниците и евакуација на ранетите.
– Не може да се зборува за руска контрола врз градот Покровск или за оперативно опкружување на украинските одбранбени сили во областа – нагласи тој.
Во меѓувреме, откако вчера беше суспендиран министерот за правда Герман Галушченко, а министерката за енергетика Свитлана Гринчук поднесе оставка поради истрагата за корупција во енергетскиот сектор, владата го отпушти потпретседателот на националната нуклеарна компанија „Енергоатом“, за кого истражителите велат дека е во срцето на корупциската шема.
– Во текот на истрагата беа отпуштени и раководителите на финансискиот, правниот и одделот за набавки на „Енергоатом“, како и советник на претседателот на компанијата – изјави доцна синоќа украинската премиерка Јулија Свириденко.
Суд во Киев започна со испитување на доказите презентирани од антикорупциските власти, чија 15-месечна истрага, која вклучуваше повеќе од 1.000 часа снимки од прислушување, доведе до притворање на пет лица и идентификување на уште седум учесници во шемата, за која се вели дека донела околу 100 милиони долари.
Лице запознаено со прашањето изјави дека осомничениот именуван од Националното биро за борба против корупција на Украина (НАБУ) како главен организатор е Тимур Миндич, поранешен деловен партнер на претседателот Володимир Зеленски. Миндич не одговорил веднаш на барањето за коментар. Миндич е ко-сопственик на Студио Квартал 95, каде што Зеленски ја изгради својата кариера како комичар пред да победи на претседателските избори во 2019 година.
Истрагата покрена прашања за тоа што знаеле највисоките владини функционери за корупциската шема. Исто така, ги врати спомените на обидот на Зеленски минатото лето да ги ограничи овластувањата на антикорупциските власти на Украина. Тој ги повлече планираните промени по масовните протести во Украина и притисокот од Европската Унија, која врши притисок врз Киев да се справи со длабоко вкоренетата корупција.
Додека Украинците изразуваа гнев и неверица поради скандалот, претседателката на Европската комисија, Урсула фон дер Лајен, изјави дека ЕУ денеска ѝ одобрила на Украина заем во вредност од речиси шест милијарди евра и ветила поголема финансиска помош на Киев.
Од таа сума, 4,1 милијарди евра е последната транша од поддршката за 18,1 милијарди евра заеми договорени досега за Киев оваа година. ЕК прецизираше дека средствата доаѓаат од приходите од руски средства замрзнати според санкциите на ЕУ.
– Ќе ги покриеме финансиските потреби на Украина за следните две години – изјави Фон дер Лајен пред Европскиот парламент.
ЕУ и другите странски партнери инвестираа во енергетскиот сектор на Украина. Русија постојано ја напаѓаше електричната мрежа, што бараше повторени поправки.
ЕУ истражува начини да обезбеди повеќе средства за Украина, вклучително и запленување на замрзнати руски средства, собирање средства на пазарите на капитал или некои од 27-те земји-членки да издвојат средства одделно за Киев.
