Младиот и сè попопуларен хрватски музичар Јаков Јозиновиќ ќе ја заврши годината со настап на едно од најатрактивните новогодишни места во регионот — Страдун во Дубровник.
Иако главна ѕвезда на вечерта ќе биде Дино Мерлин, Јозиновиќ ќе ја загрее публиката со својот препознатлив настап, а на сцената ќе се појави и Хилсон Мандела, што ветува вечер исполнета со музика, енергија и забава до раните утрински часови.
„Чест ми е да настапувам во Дубровник со Дино Мерлин и да бидам дел од толку посебна новогодишна приказна. Едвај чекам да ја почувствувам енергијата на публиката и заедно да влеземе во новата година,“ изјави Јозиновиќ за dubrovnik.net.
Младиот уметник во последните месеци бележи неверојатен успех — три распродадени концерти во Сава Центар во Белград, а четвртиот веќе е најавен. Првиот настап бил распродаден за помалку од половина час, а за вториот билетите исчезнале уште побрзо — во еден момент, 15.000 луѓе чекале онлајн за купување билети!
Покрај Белград, Јозиновиќ настапуваше и во Сараево, Будва и Подгорица, а неодамна во Кино Босна свиреше две вечери по ред. Иако сè уште нема објавено оригинална песна, тој најави дека сопствените композиции се во подготовка и дека наскоро ќе бидат претставени на јавноста.
Со вакво темпо и ентузијазам, јасно е дека 2025 година може да биде година на Јаков Јозиновиќ — млад музичар кој со талент, харизма и посветеност полека, но сигурно го освојува целиот регион.
Фото: Принтскрин/Instagram