Американскиот претседател Доналд Трамп вчера потпиша проглас со кој се забранува влезот на граѓани од 12 земји во Соединетите Американски Држави (САД), наведувајќи дека овој потег е неопходен за заштита од „странски терористи“ и други безбедносни закани.
Директивата е дел од имиграциската акција што Трамп ја започна оваа година на почетокот на неговиот втор мандат, која исто така вклучуваше депортација во Ел Салвадор на стотици државјани на Венецуела осомничени за членство во банди и напори да се одбие упис на некои странски студенти и да се депортираат други.
Земјите погодени од најновата забрана за патување се Авганистан, Мјанмар, Чад, Конго, Екваторска Гвинеја, Еритреја, Хаити, Иран, Либија, Сомалија, Судан и Јемен.
Влезот на луѓе од седум други земји: Бурунди, Куба, Лаос, Сиера Леоне, Того, Туркменистан и Венецуела, ќе биде делумно ограничен.
-Нема да дозволиме луѓе кои сакаат да ни наштетат да влезат во нашата земја, рече Трамп во видео објавено на социјалната мрежа „Икс“.